نظرية "فردة كوتشى شمال ومن غير رباط كمان ":

نظرية "فردة كوتشى شمال ومن غير رباط كمان ":D:D
فى الامتحانات غالبا كلنا بتصيبنا حالة من الدلع والموعان غير المبرر ..ونبقى فى حاجة ماسة ان حد يديك "دش" تهزيق محترم ...ويا ريت كمان لو "يلطشك " قلمين كده لو العلاقة والرصيد بينكما يسمح 

فى الفترة دى للاسف مكنتش بلاقى غير نفسى عشان تقوم بالمهمة دى ..والمصطلح الاكثر شهرة "انت فردة كوتشى شمال معفنة ومن غير رباط كمان " وكانت الجملة دى بتعملى موتيفاشن هايل ..على عكس المطلوب صراحة .
خلينا نتفق اننا "نحن المصريون" عندنا حساسية من اى كلمة انتقاد ...مولودين وحاسين اننا دكاترة فى الفهلوة ومفيش حاجة تصعب علينا ...ولو هذه المنطقة زادت شوية عندك وقربت من "ابوو العريف" يبقى انت فى خطر يا برنس !

كان من اهداف هذه النظرية انك تعترف انك ولا حاجة ...وعشان يمكن ولا حاجة تبقى مش عادلة ..اخترت تلك الفردة الكوتشى المضايقانى واللى موجودة فى كراكيبى كتوصيف للحالة ...
هى الريدى ملهاش لازمة ...وعاهدت نفسى والمجتمع والشعب اللى داخل "جمهورية نفسى " ..اننا سوف نرتقى بهذه الفردة حتى نلمعها ونصيتها وتبقى حاجة جامدة كده زى Nike او Adidas مثلا ومهما كبرت انت فى الاخر مجرد ..كوتشى ..!:D
وبدأت النظرية فى التطور ..وبدأت افكر فى كيفية ترميم هذا الشئ ..وبعد تفكير ..توصلت ان المرحلة الاولى تبدأ من الاساس ...الجزء اللى بندوس عليه ده ...تقريبا اسمه "نعل" بس مش متاكدة والله
المهم ده لازم يبقى قوى ويستحمل ...خفيف عشان ميتعبناش ..مرن كده يروح ويجى معاك
بس لازم فى نفس الوقت يبقى من جوه مريييييييييييييح ...تحس انك رجلك عايشة جوه فى سلام مش متكتفة ومخنوقة
نخلص من النعل ندخل على جوانب الكوتشى بقى
لابد وان تجمع ما بين الراحة والرفاهية ...ويا ريت يكون فيها فتحات للتهوية كده ..وتكون الماتريال اللى مصنوع منها بتمتص العرق عشان ال foot hygiene تبعك 

بعد ما تبقى الدنيا كلها تمام جوه ...تبدأ بقى تشوف الديزاين والتلميع من بره ..اتفقنا على Nike يبقى علامة الصح الكبيرة دى تتبروز كده فى مكان جميل ...تختار الوانك وستايلاتك ...واخيرا يجى الدور على "الرباط" ومع ان كتير من الناس مش بتركز فيه بس لازم يكون الرباط بتاعك smooth كده مفيش انسجة طالعة منه مبوظة شكله ...مش بيعقد وصعب فكه ..وفى نفس الوقت مش سايح خالص بحيث ان مصر كلها تقولك "لو سمحت: رباط الكوتشى مفكوك ...اربطيه عشان محدش يدوس عليه فتقعى :D:D" 

يمكن الكلام خلص بسرعة ..بس الموضوع كبير اوى اوى يعنى ...وكعادة البدايات اللى هى دايما اصعب ...انا دلوقت فى مرحلة تكوين الاساس بتاع الكوتشى اللى جوايا ..وبالتحديد فى مرحلة تختتار المادة القوية اللى بتتحمل الصدمات وتعيييييييش معاك ...وازاى تعرف ...اخبطها واصدمها ...او مش شرط هى الصدمات هتجيلك لوحدها ...لدرجة " كابتن هو كله ضرب ضرب ..مفيش شتيمة !:D"
بس خلى دايما فى بالك وانت فى الطريق انك راسم على Nike ومش اى حاجة يا ريت يكون sport كمان ..متستسهلش الطريق وتختار الكوتشى الصينى او 35 جنيه ده !!! وفى نفس الوقت متنساش انك مهما عليت انت مجرد كوتشى !:P
تحت رعاية حملة ..."لمع الكوتشى اللى جواك " :D

 --------------------

6-2-2012