عن طرطشات البحر*

عن النوم اللى طاير م العينين , زى ليالى العيد زمان
عن الشباك الصغير , وزقزقة العصافير..
عن الهوا الساقع بتاع سبعة الصبح ..
عن المحور , الصبح بدرى , وسواقين الميكروباص الشاطرين
عن صوت المزيكا المفضلة , على خلفية عيون الناس النعسانة !
عن اللحظة اللى هتبقى تمووت وتشرب قهوة بس مينفعش تكروتها
عن فرشة الكتب اللى بتشدك بمغناطيس , وعن الكلام عن الكتب اللى ممكن تقضى اليوم كله فيه , وعن الضحكة البشوشة والشعر الابيض واجمل "صباح الفل"  :)
عن الطريق , اللى دايما مبعرفش معالمه
عن الكلام اللى مبيعبرش , والكارت الفاضى !
عن الاصطباحة بصوت فيروز ,شادى , واكتر "ااااااااااااااه" بتدوب قلبك تليها ب "راجعين يا هوا..."
عن الاسئلة اللى مش سهلة ابدا , وعن الاجابات 
عن الصحرا الأليفة , والجبال اللى بتملى قلبك رهبة
عن ابعد مسافة توصلها لوحدك , عن الحرية
عن الالوووااان ,عن روح المكان , عن البلاد المش غريبة
عن يوم مسروق تعيش فيه "غريب" كليا"
عن الشمس وهى بتغلس علينا
عن السوبرماركت , وعن انى مبحبش توهان الشوبنج
عن تظبيط المؤامرة والتمثيل ال  fake
عن الدهشة , الفرحة , التتنيح
عن انك تكون مش عارف هو ايه الاحساس ده بس انت مبسوط انك حاسه
عن البحر , الازرق جدااااااااااااا , عن احساس  اول مرة
عن فيروز تانى ومنير , مين ممكن يتسمع ع البحر غيرهم !
عن الشمس كمان وكمااان
عن ال selfie مع بيوت الانجليز والتطبيع مع الاحتلال :D
عن المكان ده , وشكل الخشب , والبحر والسما
عن السلام ,داخلى وخاريخى و ثرى دى كمان
عن اللمة , عن الكلام , عن الضحك من القلب
عن الشاي بالنعناع على نغمة "اللمة لما تحلى فى ساعة العصارى ..."
عن الاسئلة كمان مرة
عن الغرووووب , هى ازاى الشمس حلوة كده !
عن الرحيل المحتم , والوداع المكروه ولا بديل
عن الطريق , عن الهوا, عن الطيران , عمرك جربت تلمس الهوا , جرّب!
عن الغنا بصوت عالى , وبقلب
عن الأداء الخارق
عن اول مرة ادوق الكاجو , او يمكن جربته ومش فاكرة !
عن المجانين , الرائعين, وعن الدهشة البلهاء 
عن الاسئلة تالت ورابع , والاجابات الاسهل
عن النهاية المفتوحة ....
وعن الtachycardia المبهجة !
-------------------------
العنوان مستوحى من "قصيدة" لـ صلاح جاهين !