فى الفجرية !

أن تبدأ يومك من غير منبه , وتفتح قبل ما الموبايل يرن , لتستقبل اولى نسمات الصباح المنعشة , مع شوية عصافير بتزقزق على الشجرة اللى جنب الشباك , 
انك تتخلى بارادتك الكاملة عن الخمس دقايق اللى بتسرقهم بعد ما المنبه يفوقك - واللى بيبقى ليهم طعم تانى خالص- ,
تقوم وانت مش شايف قدامك عشان لازم تكون فى قلب القاهرة فى تمام السابعة ,
ميهمكش الميا اللى قاطعة والهدوم المكرمشة , فى غرابة شديدة جدا تلاقى كل اللى بتعمله كل يوم فى الساعة كبيره يخلص فى ربعاية 
تنزل  للشارع وللهوا الساقع بتاع الساعة 6 اللى بيفكر بسكاشن الساعة 8 
الشارع الصبح قبل ما جيوش التتار تحتله :D
الشارع مجرد من غير الاضافات ومكسبات الطعم والرائحة اللى بتضفهاله الزحمة 
تسمع صوت خطوات الناس اللى مستعجلة , 
صوت غليان زيت الطعمية على النار ,
صوت ورق الشجر وهو بيفتح ويدخل الشمس 
تشوف جيل الطلائع وهو متجه رأسا لمكان المفروض بيتعلم فيه - لسه معرفوش اللى فيها - 
صوت ضحكاتهم , ومواضيعهم الحيوية البعيدة عن الدنيا 
طلبة اولى جامعة ...الولاد اللى بايعين القضية ودايسين بقلب , والبنات اللى واقفة مترددة على اعتاب الخجل :)
اما تلاقى طلبة صيدلة معاك فى نفس الاتوبيس وبيزاكروا اناليتكل :D
احساس المشهد من بره , انا كنت كده فعلا !! 
عن ازاى المرحلة دى كانت صعبة اوى , وممتعة اوى , وفيها طاقة جبارة اوى ..وعدت !
عن مفارقة انهم بيعتبرونى معاهم فى سنة اولى ويسألونى كلية ايه ؟! :D
انك تبسط حد فيلقى عليك سيلا من الدعوات والامتنانات 
عن المشى ...ووسط البلد الصبح , والشوارع اللى نفسى ماتلخبطش فيها بقى 
وانك تحس انك عايش بجد كل تفاصيل يومك , ساعة بساعة 
اما تمشى وعضلاتك تشتغل فتجيب اخرك 
وتروح الشغل وتتطحن لاخر اليوم 
وطريق العودة والزحمة 
انا انهاردة بقالى "17" ساعة عايشة بجد , عايشة بقلب 
ممتنة لاصحابى "ياسمسن وشيماء" اللى عملوا اللى منبهات مصر كلها مقدرتش عليه وخلونى صاحية من بعد الفجر 
ممتنة للمشى بنية الرياضة اللى بيقولوا عليه jogging  اللى حسسنى انى عندى رجلين ليهم لازمة :D
ممتنة للميا -الساقعة- اللى بتروى العطش , لمزيكتى المفضلة والباندات اللى بتعلمنى اكون انسان افضل 
ممتنة للعظيم اللى اخترع النسكافيه , والصينين اللى اخترعوا المج :D
ممتنة لفرصة جديدة كل يوم بتيجى , 
كل اللى عليك انك بس تتنفس , وتعيشه على مقاسك !
عيشها بقلب ;)

theme song: 
الحلوة دى