30 و1 يوم

انهاردة اليوم ال 31 لانضمامى لحوليات ولانطلاق مدونتى الحبيبة بعد صراع من التردد والتأجيل والتأخير
كانت دايما عندى فكرة عن المدونين دول انهم السكان الاصلييين لكوكب تانى وجايين فى رحلة اجبارية للارض ! :D
كنت شايفاه عالم خيالى جميل , ممنوع الاقتراب مته والتصوير 

وبالنسبة لى ,شايفة ان كتاباتى القليلة المتواضعة فى الكام سنة اللى فاتوا لا ترقى انها تنافس او تاخد حيز
لحد ما جت فكرة حوليات , فى مرحلة فى حياتى كان الشعر فيها "ليه لأ"
بطلت افكر وانقد اللى انا باكتبه , وكان المهم عندى انى ارجع بعد توقف طويل مرير دخل فى 5 شهور
كان بيجى عليا وقت اقعد اعيط عشان مش قادرة اكتب
بعد رحلة بحث طويلة , اكتشفت فيها ان هذا الفعل -الكتابة- هو اللى انا عايزة اقضى باقى حياتى باعمله 

واول ما قررت كده , لقيت كل حاجة طارت ..تخيل انت بقى ,سنة من حياتك تضيع فى البحث عن your passion
وتبقى ليلى مراد ,وقلبى دليلى وكده , وتضيع فرص كتيرة لحاجات تانية
وفى الاخر , هذا الدماغ التعبان ميبقاش فيه كلام يتقال !
المهم , من منطلق ليه لأ , قررت اشارك , وامسك الكيبورد وال blank page تانى
وحجزتلى مكان فى فضاء هذه المجرة , وكانت "دراجة هوائية" هى عنوانى
وبدأت , ورجعت اكتب ,ومبقتش بافكر انقد اى حاجة باكتبها , يمكن عشان مبعرفش ايه رأى الناس اصلا !
ودى كانت نقلة نوعية بالنسبة لحد بدأ كتاباته على الفيسبوك,متعود على لايكات وكومنتات وشير وحوارات كده يعنى
هو صحيح معظم الجمهور صحابى وبيجاملونى :D
بس كتير كانوا بيوجهونى لحاجات محتاجة احسنها واعليها , وكنت دايما باحاول اعمل بالنصيحة
هنا بقى , صحرااااااا , ولا الهوا , مرات قليلة بس اللى بالاقى كومنت
وعندى 3 متابعين غاليين , وتقريبا قربت اوصل ل 1000 واحد زارونا ,حالتى صعبة مش كده! :D
بس انطلاقا بردو من ليه لأ , والمستوى التالى ليها "مكملين "
انا لسه هنا ,بامارس اكتر حاجة بتخلينى احس انى عايشة ,باكتب
يهمنى طبعا ان اللى اكتبه يعجب الناس , ويكون فى ناس بتحب تقرالى , بس الاهم فى المرحلة دى انى استمر على القتال
مستمرة بعد ال3 و1 يوم ,
لأكتب نفسى بنفسى 

:))