فيها حاجة حلوة !

كاميرا (1)

"يوم فى بلدنا كلاكيت اول مرة"
قلب القاهرة ,كورنيش النيل ,باب صيدلة اللى ع البحر ,درجة الحرارة نظريا حاجة واربعين ,عمليا ووسط الشمس الحارقة ,والزحمة وتلك الكمية من البيب بيب والناس المكشرة توصل لـتمانية وسبعين درجة ونص
الساعة 10:43
الو ايوة يا شروق
صوت لسه بيحاول يهرب من الاحبال الصوتية :ايوة يا ايموز -بغض النظر عن ايموز دى :D-
ايه يا بنتى انتى لسه نايمة ؟!
لأ صاحية ,ربع ساعة وهاكون عندك
قشطة
.....
نعمل حاجة تكسر الملل بقى ,تفتكروا  ايه ممكن يتعمل !!
نقعد نكلم شوية مع النيل ؟!
نيل ايه ..ده ترعة وبتستهبل اصلا ..فين النيل ده - كل دى زبالة ,بلد ***** اصلا -
ندور طيب على حتة ضل نقعد فيها , العبقرى اللى زرع الشجر بعيد عن الديكك اللى بيتقعد عليها دى تفتكروا كان عايز يعذب اهلنا يعنى فى هذا القيظ -مفيش فايدة فى ام البلد دى-
الساعة 11:09 ,بتقولى ربع ساعة اهو نص ساعة عدت ولسه مجتش , وكمان كانت بتقولى انا 11:00 sharp  !
الساعة 11:14 بتأمل مبنى الكلية والطلبة الجدد ,صيادلة المستقبل اللى بيقدموا ورقهم , نفسى اروح اقولهم فكروا الف مرة قبل ما يفوت الاوان ,ضغطى عمال يعلا , والدنيا بقت جراى غامق ,المكان ده فيه اشباح بتحاربنى يا جدعان ,
عربية حمرا ,يمين ...الحمد لله ..وصلت
.......
هنروح مدينة نصر ازاى ,طريق النصر ورابعة مقفولين ,يعنى هنتسوح - ام البلد اللى بقت كلها جدران عازلة دى -

العمارة اللى قصاد سيتى ستار ,الساعة 12:30
يلا نطلع نشوف الشركة دى ايه نظامها , واقلب الانترفيو ونطلع على سيتى على طول
قشطة
فى ال waiting area الساعة 1:50 ..انا والملل وهواك , ديكور الشركة كان ممكن يبقى احسن من كده على فكرة
يلا بينا
ايه الاخبار
ايه الراجل الغلس ده , دى شغلانة تانية خالص غير اللى قالوا عليها
يعنى هو شايف نفسه كده وكمان غلطان ,مش هنخلص من الاشكال دى بقى - مفيش فايدة-
سيتى ستارز خلاص هاحقق ال objective بتاع اليوم اخيرا , هاكل cinnabon وايس كريم وهاشترى الشنطة اللى جايلها من محافظة تالتة خاالص
الساعة 3:30
نتحرك دلوقت بقى عشان مروة مستنية
(من غير سينابون وايس كريم والشنطة !)
طريق العودة ..تسويحة تانية وطرق مقفلة -استغفر الله العظيم يا رب-
حااااسبى يا شرووووق
شخص ما : والله الفانوس ده لوحده بـ150 جنيه غير الاكصدام اللى اتكسر
مفاوضات قصيرة
اشخاص تانيين : خلاص يا انسة هو كده واخد حقه وزيادة ومرضى
نهاية طبيعية ومتوقعة فى بلد نحس , مفيش فايدة .
---------------------

كاميرا (2)

الساعة 10:43
الحمد لله انى وصلت بدرى ,الاشجار اللى حوالين الكلية كبرت اوى , اقعد تحت الشجرة -like a boss فى شارع كل اللى فيه مستعجلين وبيب بيب كتير وانا عندى وقت :P-
اشوف بقى الكتب اللى استعرتها هأبدأ بايه فيهم , واخلص البلايليست اللى شغالة
وعند الكلية قابلت مها , مشفتهاش من زمان جدا وكانت وحشانى بجد , لو شروق جت 11 شارب مكنتش هاشوفها !
فى الطريق:
ايه بقى ايه الاخبار ؟!
(كلام كتير , ملخص اللى حصل واللى حاصل وقرارات مصيرية , ومشكلة اتحلت اما حكيتها ,ووو)
ل و ر (الطيب)
سواق الميكروباص الجدع اوى , اللى سألناه ع الطريق , وقالنا امشوا ورايا , عرفنا طرق عمرنا ما دخلناها قبل كده -اسرار مهنته بقى- عشان يتفادى الزحمة والطرق المغلقة
ل و ر , كان اما يلاقينا بعدنا عنه كان بيقف يستنانا نقرب وبعدين يكمل لحد ما وصلنا
الشاب ذو التى شيرت الاسود
اللى نزل من الميكروباص عشان يقولنا اليوترن الجاى عشان مكناش واخدين بالنا ان و ر ل بيدينا كلاكس :D
الشاب اللى لابس نضارة والى جنيه
واحنا داخلين خلاص ع اليوترن "خلاص ,نروح احنا بقى !!" - ااه خلاص اطلقنا سراحك يا و ر ل :D"
الانترفيو :الوايتنج اريا
كنت بارغى مع نوران على ما شروق تخلص , نور ماكلمتهاش من زماان اوى , نور بابقى مبسوطة جدا اما باتكلم معاها ونحلم مع بعض !
سيتى ستارز
دخلنا مكان واحنا خارجين ولقينا فيه sale  على بلوزة حلوة اوى عجبتنا احنا الاتنين , فقررناا نشتريها ونطقم سوا :D
- ده اسرع شوبنج فى التاريخ , بادرب على ال decision taking  :D
ماكلتش ايس كريم وسنابون عشان شروق كانت صايمة والحاجات دى مبيبقلهاش طعم لوحدك , بتبقى احلى فى اللمة :)

طريق العودة:
3 سواقين تاكسى , وواحد راكب محترف قعدوا يشرحولنا فى التطريق على غرار المراجعة النهائية فى ثانوية عامة , ومحدش اضايق من اننا مش فاهمين حاجة ما اللى بيقولوه وبنخليه يعيد كذا مرة !
وقت الحادثة كان فى ناس هبينزلوا من التاكسى , ربنا ستر اننا فرملنا بدرى , او مش عارفة ازاى بس ربنا ستر وجت على الفانوس والاكصدام بس وشوف كده الموقف واحكم:
صديقتى -شروووق ..باقول اسمك اهو :D- نزلت واعتذرت عشان كانت غلطتنا
الراجل وقف محترم ومزعقش ولا حاجة , قال بس تكاليف التصليح , وده حقه عشان ده وسيلة اكل عيشه
واحنا مفاصلناش
والجمهور اللى جه وقف معانا , كان بيحل الامور وملوش اى مصلحة
وفى اخر الحدوتة , شفت مروة وعرفت انى بالبس ازرقات كتير :D
فى طريقنا وبعد الرعب ده , شفنا لوهلة الدنيا من كاميرا (1) , لحد ما رجعنا فلاش باك , وحاولنا نشوف الدنيا بطريقتنا

شوفنا الجدعان اوى اللى وقفوا معانا , ناس عايزة تساعد وربنا , ناس لو لقت حد عاقل يقولهم على حاجة تغيرهم للاحسن وتغير البلد هيعملوها
ناس على رغم اختلافنا -خدت بالك احنا اتكلمنا على كام واحد - كانوا بيتكلموا نفس اللغة ,بيتكلموا مصرى !
ولا صنفونا معاهم ولا مع التانيين
ناس ولا همها باب الحقوق والحريات المشوه فى الدستور ولا المادة التانية ولا هوية الدولة , بس لازم يعرفوا واحدة واحدة , وده دورنا احنا ,لو واجهنا بعض بالحقيقة وعرفنا اننا مسئولين , ولو لأ يبقى خلينا فى الش السفر بتاع كل يوم
والله يجى منهم ,بس حد يعبرهم !
شفنا المتع البسيطة اللى سرقناها من يوم روتينى بحت اصلا , وخروجة مش مترتب لها
ممكن نكون تعبنا , ومن حقنا نتعب عشان اللى بيحصل ده كتييير , بس من الذكاء اننا نفصل ,عشان نعرف نكمل
ماتحسش بالذنب اما تضحك وتنبسط ,انت بتعمل كده عشان تحافظ على النوع الانسانى حيا لبكرة !
شفنا فيها حاجة حلوة عشان ظبطنا عدسة عينينا على الحلو اللى هو حقيقى موجود جنب السواد بس السواد واخد حقه وزيادة
وده مهمش مقتصر على شوية متفائلين بلهاء ,
صدقنى احنا ابعد ما نكون عن البله , بس اختارنا الاختيار الاصعب ماستسلمناش لليأس
ولو مصمم ان احنا بلهاء بردو مش فاهمين حاجة ,خلينى اقولك ان البلهاء دول هيغيرو العالم ان شاء الله
العالم بتاعهم اللى هو لسه موصول بيها ,رغم قوة الطرد المركزى اللى بيمارسها علينا الجميع , اولهم انت بيأسك وخروجك من التحدى , فكر تانى كده ,فيها حاجة حلوة ؟!
مكانك معانا محجوز , هنغير العالم , مستنينك ! ;)

-------------------
soundtrack: cocacola commercial 213
اتجنن !
http://www.youtube.com/watch?v=JkJG0wnAjZk

#حوليات
فكرة : شروق غلاب - إيمان عبدالحميد
الشئ وضده
النص المليان والفاضى